NE KÖLSCHE JUNG Köln 2001

ich jrüß euch all von fern und nah
von Nippes bis Amerika
d´r liebe Jung es widder da!

Vun drußen vum Wald do kumm ich her
ich muß üch sare, he stink et schwer,
no Ruuse, Tulpe un Narzisse,
saht wor dä letzte Sommer nit bedresse ?
Wochelang nur Kält un Rään.
Sujet han mer janit jähn.
Kaum einer wollt vun singer Heimat mie jet wesse,
all sin se no Malorka usjeresse.
Nur ich, ich kunnt ming Muttersproch nit messe,
ich bruche Kölle, Kölsch un kölsche Klaaf
un do drop rofen ich jetz Kölle Alaaf !

Als kölsche Jung will ich üch sare,
dunn ich fast alles met Humor erdrare!
Doch ich muß sare op ming Ihr,
met demm Humor fällt dat och manchmol schwer.

Inseidergeschäfte, schwatze Kasse,
et es doch wirklich nit zo fassen!
Ov schwatz, ov rut, ov jrön, ov jäl,
ich jläuf, die Politicker sinn allemole schääl!

Nur Posten-Pösjen un Diätenschacher
dat sin für die, die jrößte Kracher.
Mir sinn denne doch total ejal,
leev Lück esu jet fingen ich fatel.
Wo bliev do die Politmoral?
Dat Wahltheater wor en Qual !

Stellt üch vür et es Wahl un keiner jeit mie hinn !
Für üch Politicker en unvürstellbar Ding ?
Dann denkt ens drövver no !

Üb immer Treu un Redlichkeit,
dat sollt Ihr Üch ens merke
dann künnt Ihr Wahlbeteilijung
en Zukuft och verstärke.

Ich jründe jetz ming eijene Partei,
vun allem Kuschelmuschel frei !
Heiße soll se de Jeckepartei!
D´r Beitritt der es frei.
Un wat mir maache, dat es luuter Narretei
vun alle Zoten frei.
Mer wolle Spaß un Freud uns maache,
wollen ihrlich, offen laache!
Uns Schlaachwoot dat heiß Tolleranz
un immer Jeck los Jeck elans!

Zo jedem Aanlas maache mer e Feß,
natürlich ohne Feierstreß.
Wer met uns fiere well soll kumme,
am beste met de decke Trumme,
mem Schrummbas un d´r Quetschkommod.
Un bunt maskeet, dat deit dann och de Aure jot !

Jeck zo sinn em Fastelehr,
dat fällt tatsächlich mänchem schwer.
Demm saren ich, kumm doch zo uns, mir helfen dir!
Mir zeijen dir, wat Jecksinn es.
Dä Jriesjram dä kütt en de Kess,
dofür kriss du en rude Naas,
domet du wat zu laachen has.
Un du wes sinn, luurs du en d´r Spejel,
dat es zum Jecksinn alt die echte Rejel.
Un nem dich selver nit zu ähnz,
dat drief su mänche Futz us dem Jeheens!

Als kölsche Jung will ich üch sare,
et es bahl nitmie zo erdrare,
wat mänchmol en d´r Zeidung steit.
Su mänche Presseheini deit mir leid,
drömm trett ich jetz mimg Meinung breit.

Em vürje Johr do kunnt mer hühre,
uns Funkemariescher möhten sich scheniere.
Ihr Kostüme wören us d´r Mode,
mer sollt sich ens an Rio orientiere,
dät su ene Schwadlappe lamentiere,
se hätten Nuttestivvele ahn,
och köhm ich ahn dä Kähl bloß drahn.

Wer em Zusammenhang met unse Funkemariescher
vun Nuttestivvele sprich,
dä hät für mich ne Sonnestich!
Karneval en Rio, jut un schön,
wo blieven do die kölsche Tön ?
Nix jejen die nette bläcke Mädcher do,
do es et wärm et janze Johr.
Bei uns es dat Marieche em Winter Marketänderin,
met Indianerdänz do hät dat nix em Senn.
Wer Fleisch sin will,
demm sare ich, jank en de nächste Metzjerei,
do es sujar d´r Entritt frei.
Wer ävver nackisch Mädcher kucke will,
für denn do jit et hück su fill,
ov FKK, Revüe, Stripptis, Pornoschopp,
ov janz normal oder total beklopp,
für jeden es do jett zo fingen.
Doch es dat kein Fastelovendsdinge.

Als kölsche Jung will ich üch sare,
mer höht jo immer widder Klare,
vun Büttenredner he vum Podium,
der Witze klau jeht um.
Doch ich muß sare
och dat nemm ich nit krumm,
de Haupsach es d´r Schlengel
dä triff op die decke Trumm.
Ne jode Wetz, jot fürjedrare,
der lit bestemmp nit quer em Mare.
Un wer dä Wetz am beste bränk,
dä kritt d´r Ruhm dann och am Enk !

Wie wor zo Köln et doch vördem
met Orijinale ach su schön!
D´r Schmitze-Jrön un die doof Noss,
die brahten niemols uns Verdruß.
Do woot och keine Buhei öm Wetzeklau jemaht,
denn jeder hat sing Eijenart.

D´r Schütze Bumm, d´r Trötemann,
dä hück noch keine Ton op der Tröt spille kann.
D´r Klöckner huh vum Rothuusturm,
dä lückte mänches mol och Sturm,
un helt su mänchem ene Spejel vür,
mol höch un manchmol deftich.

D´r Streukoche un singe Kolesch vum 11. Revier,
d´r Wingsillije, ich sach et dir,
dat woren Tüpen Stöck für Stöck,
die woren für d´r Fastelovend un Kölle
doch ein einzich Jlöck!
Och wenn et doch wie domols wör!
Doch kütt die Zigg nit widder her.

Ze Kölle jov et ens ne Mann,
hä nannt sich Toni Tröötemann,
ne Inseider hes et,
ne Mann, dä sich uskennt em kölsche Klüngelsfasteler
Esch klung dat jot un och janz prima,
doch wat hä säht wot immer schlemmer.
Drömm woht hä schnell versetz
un durch die Stimme Kölns ersetz.
Dä weiß zwar nit su jot bescheid,
doch dofür schrief hä nur
wat bestemmte Hähre nit wieh deit.
Do deit mer doch die Presse leid!
Nit dat ich et schön finge,
wenn mer em Dreck wöhlt,
evver da unse Fasteleer
doch steets frei vun Zooten sei,
es mir dat nit einerlei.

Die Zigg die läuf, die Zigg die rennt,
saht hann ich irjend jet verpennt?
Ich jläuf dat mänch einem d´r Kiddel brennt.
Wie kann mer su en Kranke noch kuriere,
vun denne uns Pänz luuter Schwachsinn liere?
Männer sind Schweine,
Scheißegal ich liebe dich,
es ist so schön ein Arschloch zu sein.
Lück, ich finge dat jemein
un ehrlich jesaht och jar nit fein.
Die sinn doch wohl total beklopp.
Haut denne doch op die Schnüß ens dropp.
Wo bliet die jode ahle Tradition?
Für uns Kultur es dat ne Hohn.

Us traurijem Ahnlas,
et wor jo wirklich nit zum laache,
mohte mer en OB-Neuwahl maache.
Wat wor dat für en Hexerei,
wer dann no d´r beste sei.
Doch wor nur eine richtije Kölsche dobei.

Als OB-Fritz es hä bekannt,
hä rümp jetz op em kölsche Land.
Met Schnäuzer un met sichrer Hand
rejeht hä jetz am Rheinesstrand.

Als eschte mohten jetz laut OB-Fritz
die Staarenkästen weichen,
dann sollt d´r Verkehr em Ampelkaos
nit mie schleichen.
Die Bortsteinschwalwe krijen jetz e Nest,
demm ahle Filz jit hä d´r Rest.
Hä kömmert sich öm jeden ...........
Dat hä als ankajeete Mann
sich nit nur Fründe maache kann,
dat muß mer schon verstonn su dann un wann.
Doch jläuven ich janz feß,
dat hä d´r Richtje für uns es.
Denn hä hät Hätz.
Dat es et Wichtichste wat mer für uns Kölsche broht,
de Haupsaach es, et Hätz es joot.

Ich hat dis Naach en Vision,
mer stunnten all zesamme ungerm kölsche Dom,
un han de Jlocke lügge hühre.
Do woht et plötzlich doch janz still,
dann jing et Himmelspötzje op
un alles wahte jitz do drop,
wat wohl passeere dät.

Do kom d´r Hähr erus un säht:
Ihr Kölsche sid de dollste Ströpp,
Ihr hat kei Holz wie andre en de Köpp,
behalt ühr jecke Tolleranz un och ühr Jeck los Jeck elans.
Bei üch do föhlt sich jeder wohl.
Ihr sollt die Welt jetz neu jestallde,
dat sich die Völker nit mie länger spalde,
dobei am Brauchtum jot fasshalde.
Schafft av Politiker un Funktionäre
un och die ewich jesterije Hääre,
die et bes hück noch nit bejriffe han,
dat mer met Heil nix heilen kann.

Dracht ühre Fruhsenn en de Welt
un dann schafft av dat widderlije Jeld.
Fiert jede Jeck jrad wie ne Held
un hald vun Unrat frei et Feld.

Als Kölsche Jung will ich üch sare,
als Kölsche ben ich nit neutral,
als Kölsche ben ich international,
en Kölle schleid et Hätz d´r Welt.
He wehd keiner en de Eck jestellt,
he danzen alle Nationen unger einem Himmelszelt.
Drömm han mer am Ruusemondach
och die jrößte Friedensbewejung vun d´r Welt.

Och Färf un Jlaube spellen he kein Roll,
ov rut, schwaz, jähl oder wieß,
mir sinn dovür nit fies.
Wat es dat schön bei uns en Kölle,
mer höht se all en einer Sprooch verzelle.
Zwar höht mer och vill andre Tön
un trotzdem es uns Kölle schön! 

Als kölsche Jung will ich üch sare,
ein Deil mäht mer em Fastelovend schwer Verdruß,
dat mer baal für jedes Fützje jet bezahle muß.
Muß du ens Pippi, dat es stark,
dann koß dat hück doch jlatt en Mark.
E Fläschje suure Wing koß vezisch, minimum,
no nemmt mir dat nit krumm,
dat es doch wohl en Unikum.
Et heiß et Publikum es zu verwöhnt,
mer muß de düürste Kräfte holle,
weil de Minsche söns nit en de Sääle kumme wolle.

Ich saren üch dat es bestuß,
maht widder zivile Entretts- un Jetränkepreise,
un dout d´r Wingzwang us em Saal verweise.
Ihr weht sinn, dann krett Ihr jede Sitzung voll,
die Lück die fieren raderdoll
un han och Spaß an kleine Jecke,
die dann och widder en de Bütt entrecke.
Su mänches Talent wehd widder entdeck.
Un dann es och unse Sitzungskarneval
widder wie hä sinn soll, su richtich jäck.

Als kölsche Jung will ich üch sare,
ich dät et jo och jähn ens ware,
als Prinz beim Ruusemondach metzefahre.
Doch es dat nit ming Dinge,
ich muß su lang ich kann,
als Jäck op d´r Stroß beim Volk erömspringe.
Ich bruche die Pänz janz us d´r Nöh,
un och dat Jeschrei Kamelle, Alaaf un juche.

Uns Dreijestehn dat sinn 3 Junge,
die sinn demm Herrjott jot jelunge.
Die brenge Spaß un Freud un Schwung,
do wehd de ältste Möhn selfs widder jung.
Met Folljas jonn die drei eran
un Turbofranz pak alles ahn.
Un mäht für uns do drus et Bess.
Inn schwade hüre es e Fess,
do kritt mer wirklich keine Stress.
Wann hä de decke Trumm sich schnapp,
weis jeder, jetz jit hä ahn d´r Takt.
Buur Walter nimp et Jlockespill
un stemp dat Leedche ahn,
dann kütt de Jungfrau Hansi
mem Trömmelsche och drahn.
Dobei kütt jede Saal en Schwung
un ruckzuck es die Zigg alt öm
un se müsse wigger jonn.

Die drei, die sinn schon richtich,
se fieren d´r Fastelovend esu richtich häftich.
Selfs wenn d´r Prinz ens tritt donevven
koß dat noch lang kein Prinzenlevve.
Em Zweifelsfall weed hä jefahre
un op de Bühn erop jedrare.
Ansonsten widdersteht hä esu manche Jefahre,
och wenn sich hinger imm de Funke nit verdrare.
Immerhin es hä ne richtije Kähl,
un nit wie dä Düsseldorfer Aloa schääl.

Als Kölsche Jung will ich üch sare,
als Kölsche kann mer et Levve janz jot erdrare.
Ov ärm ov rich,
e Jlas Kölsch op d´r Desch,
e besje Humor un Tolleranz,
e besje Jeck los Jeck elans,
un keine opjerächte Danz.
E besje Jecksinn, dat deit joht,
dat jit dann neue Levvensmot!
Dout kräftich Fastelovend fiere
un halt mer jo ming Stadt en Ihre!
Ich mach jetz Schluß met mingem Klaaf,
un jröße vun Hätze met Kölle Alaaf !              

Rede 2001

Nase202

Ne kölsche Jung

Nase203

Wer hä es

Nase204

Wat hä mäht

Nase205

Thiater

Nase206

En klein Kossprob

Nase207

Wat hä sare will

Nase208

Rede 2001

Nase209

Rede 2002

Nase210

Rede 2003

Nase211

Rede 2004

Nase212

Rede 2005

Nase213

Rede 2006

Nase214

En kölsche Meinung

Nase215

En Verbindung tredde

Nase216

Bilder

Nase217

Links

Nase218

Gästebuch

 

 

 

 

ps_logo1_P2177175

Fritz Specht, Bockemsweg 1b, 53804 Much, Tel. 02245-9074768, Fax. 0321-21216306, E-mail: fritzf@ne-koelsche-jung.de